චීන වේගවත් විලාසිතා සමාගමක් වන SHEIN සමාගමේ එක්සත් රාජධානියේ (UK) විකුණුම් පසුගිය වසරේදී තුනෙන් එකකින් ඉහළ ගොස්, සමාගමට විශාල ලාභයක් ගෙන දී තිබෙනවා.
2024 සම්පූර්ණ වසර සඳහා වූ එහි වාර්තා පෙන්වා දෙන්නේ, එක්සත් රාජධානියේ පාරිභෝගිකයින් වෙත සිදු කළ විකුණුම් පවුම් බිලියන 2ක් දක්වා ළඟා වූ අතර, එහි ලාභය 2023ට සාපේක්ෂව 57%කින් ඉහළ ගිය බවයි. කෙසේ වෙතත්, ඉදිරියේදී ඉහළ උද්ධමනය සහ වැඩි වූ ජීවන වියදම, පාරිභෝගිකයින්ගේ මිලදී ගැනීමේ පුරුදුවලට බලපෑ හැකි බව සමාගම පවසා තිබෙනවා.
පවුම් 135ට අඩු වටිනාකමක් ඇති පැකේජ සඳහා වූ බදු නිදහස් කිරීම් (exemption) සමාලෝචනය කරන බව එක්සත් රාජධානියේ රජය නිවේදනය කිරීමෙන් පසුව, මෙම සන්නාමයට ආනයන බදු (import taxes) බලපෑම් කළ හැකිය. එක්සත් ජනපදයේ (US) ජනාධිපති ඩොනල්ඩ් ට්රම්ප් (Donald Trump), අඩු වටිනාකමක් ඇති පැකේජ සඳහා වූ බදු සහනයක් අත්හිටුවීමෙන් පසු, SHEIN සමාගම දැනටමත් එහි මිල ගණන් ඉහළ දමා ඇත.
එක්සත් රාජධානියේ සහ එක්සත් ජනපදයේ මෙම නීති රීති, Shein සහ එහි ප්රතිවාදී Temu වැනි සමාගම්වලට පාරිභෝගිකයින් සඳහා මිල අඩු කිරීමට ඉඩ සලසා දී ඇත. නමුත් සමහර සිල්ලර වෙළෙන්දන් තර්ක කළේ, මෙම සමාගම් ඔවුන්ගේ ව්යාපාර අඩපණ කරන බවත්, එය High Street සන්නාමයන්ට ව්යාපාරයෙන් ඉවත් වීමේ අවදානමක් ඇති කරන බවත්ය.
චීනයේ ආරම්භ වී දැනට සිංගප්පූරුවේ (Singapore) මූලස්ථානය පිහිටුවා ඇති Shein, මිල ගණන් අඩු මට්ටමක තබා ගැනීමටත්, පාරිභෝගිකයින්ට අඛණ්ඩව මිලදී ගැනීම් දිරිමත් කිරීම සඳහා ප්රවර්ධන සහ ත්යාග පිරිනැමීම කෙරෙහිත් අවධානය යොමු කරයි. වේගවත් විලාසිතා සඳහා ප්රසිද්ධ මෙම සන්නාමය, සෙල්ලම් බඩු සහ ක්රීඩා භාණ්ඩවල සිට මුළුතැන්ගෙයි උපකරණ දක්වා පුළුල් පරාසයක නිෂ්පාදන අලෙවිය සඳහාද පුළුල් වී ඇත.
උපුටා ගැනීම: සියළු තොරතුරු BBC ඇසුරෙනි.
