තායිලන්තයේ අගමැතිනිය වන පැටොංතාර්න් ෂිනාවත්රා (Paetongtarn Shinawatra) ට අඟහරුවාදා දිනයේදී ඇගේ ධුරයෙන් අත්හිටුවීමට ව්යවස්ථාපිත අධිකරණය නියෝග කර තිබෙනවා. කාම්බෝජයේ හිටපු නායක හුන් සෙන් (Hun Sen) සමඟ ඇති වූ දුරකථන සංවාදයක් හේතුවෙන් ඇයට එරෙහිව සදාචාර පරීක්ෂණයක් පැවැත්වෙන තෙක් මෙම අත්හිටුවීම ක්රියාත්මකයි. මෙම සිදුවීම පුළුල් දේශපාලන අස්ථාවරත්වයක් ඇති කර තිබෙනවා.
මාස 10ක් පමණක් අගමැති ධුරය දැරූ 38 හැවිරිදි පැටොංතාර්න්, ජූනි 15 වැනිදා සිදුවූ දුරකථන ඇමතුමකදී ආචාර ධර්ම උල්ලංඝනය කළ බවට සෙනෙට් සභිකයන් 36 දෙනෙකුගෙන් යුත් කණ්ඩායමක් විසින් චෝදනා කරනු ලැබුවා. සත්ය බවට තහවුරු වූ එම හඬ පටයේ, දේශසීමා ගැටුමකින් පසු තම හමුදාවේ ක්රියාකලාපය විවේචනය කළ බවත් වාර්තා වෙනවා.
ප්රතිවාදීන් ඇයට ජාතික අවශ්යතා පාවා දීමක් සිදු කළ බවට චෝදනා කරන අතර, බැංකොක් අගනුවර විරෝධතා පවත්වමින් ඇයගේ ඉල්ලා අස්වීම ඉල්ලා සිටිනවා. ප්රධාන සභාග හවුල්කරුවෙකු වන භූම්ජායිතායි පක්ෂය (Bhumjaithai party) පසුගිය සතියේ සභාගයෙන් ඉවත් වීමත් සමඟ, ඇගේ ෆෙයු තායි (Pheu Thai) පක්ෂයේ බලය දුර්වල වී තිබෙනවා. පැටොංතාර්න්ට ජනප්රියත්වය වේගයෙන් අඩුවීමක් මෙන්ම පාර්ලිමේන්තුවේ විශ්වාසභංග ඡන්දයකට ද මුහුණ දීමට සිදුවී තිබෙනවා.
අධිකරණය තීන්දුවක් දෙන තෙක් පැටොංතාර්න් සංස්කෘතික අමාත්යවරිය ලෙස කැබිනට් මණ්ඩලයේ රැඳී සිටිනු ඇත. මෙම සිදුවීම තායිලන්තයේ නොසන්සුන් දේශපාලන වාතාවරණයට තවත් අවිනිශ්චිතතාවයක් එක් කර තිබෙනවා.
උපුටා ගැනීම: සියළු තොරතුරු Newswire ඇසුරෙනි.
