එලොන් මස්ක්ගෙන් නව දේශපාලන පක්ෂයක්!

ඇමරිකානු ජනාධිපති ඩොනල්ඩ් ට්‍රම්ප් (Donald Trump) සමඟ ඇති වූ දේශපාලන ගැටුමකින් සති කිහිපයකට පසු, එලොන් මස්ක් (Elon Musk) නව දේශපාලන පක්ෂයක් දියත් කරන බව නිවේදනය කර තිබෙනවා. මොහු සිය X සමාජ මාධ්‍ය දී ප්‍රකාශ කර ඇත්තේ, තමන් “ඇමරිකා පක්ෂය” (America Party) පිහිටුවා ඇති බවත්, එය රිපබ්ලිකන් (Republican) සහ ඩිමොක්‍රටික් (Democratic) පක්ෂ ද්විත්ව පක්ෂ ක්‍රමයට අභියෝගයක් බවත්ය.

කෙසේ වෙතත්, මෙම පක්ෂය ඇමරිකානු මැතිවරණ බලධාරීන් සමඟ විධිමත් ලෙස ලියාපදිංචි කර ඇත්ද යන්න පැහැදිලි නැති අතර, මස්ක් තවමත් මෙම පක්ෂයට නායකත්වය දෙන්නේ කවුරුන්ද හෝ එහි ස්වරූපය කුමක්ද යන්න පිළිබඳව විස්තර ලබා දී නොමැත.

නව පක්ෂයක් දියත් කිරීමේ අදහස මුලින්ම මතු වූයේ ට්‍රම්ප් සමඟ මස්ක්ට ඇති වූ මෑත කාලීන ප්‍රසිද්ධ ගැටුම අතරතුරයි. මෙම ගැටුම හේතුවෙන් මස්ක් ට්‍රම්ප් පරිපාලනයේ සිය තනතුරෙන් ඉවත් වූ අතර, ඔහුගේ හිටපු සගයා සමඟ දරුණු ප්‍රසිද්ධ ගැටුමකට එළබිය. එම ගැටුම අතරතුර, මස්ක් X හි සමීක්ෂණයක් පළ කරමින් එක්සත් ජනපදයේ නව දේශපාලන පක්ෂයක් අවශ්‍යදැයි පරිශීලකයන්ගෙන් විමසා තිබුණි.

මස්ක් 2024 මැතිවරණයේදී ට්‍රම්ප්ගේ ප්‍රධාන ආධාරකරුවෙකු වූ අතර, ඔහුට නැවත බලයට පත්වීමට ඩොලර් මිලියන 250ක් (පවුම් මිලියන 187ක්) වියදම් කළ බව වාර්තා වේ. ට්‍රම්ප් සමඟ ඔහුගේ ගැටුම ආරම්භ වූයේ මැයි මාසයේදී ඔහු පරිපාලනයෙන් ඉවත් වී ට්‍රම්ප්ගේ බදු සහ වියදම් සැලසුම් ප්‍රසිද්ධියේ විවේචනය කිරීමත් සමඟයි. ට්‍රම්ප් සිය “One Big Beautiful Bill” ලෙස හැඳින්වූ මෙම නීති සම්පාදනය, කොන්ග්‍රසය විසින් සුළු බහුතරයකින් සම්මත කරන ලද අතර, ජනාධිපතිවරයා විසින් මෙම සතියේදී නීතියක් ලෙස අත්සන් කරන ලදී.