Johnson & Johnson (J&J) ඖෂධ දැවැන්තයාට එරෙහිව එක්සත් රාජධානියේ (UK) විශාල නීතිමය ක්රියාමාර්ගයක් ගෙන ඇති අතර, සමාගම විසින් ඇස්බැස්ටෝස් (asbestos) වලින් දූෂිත වූ බේබි පවුඩර් (baby powder) දැනුවත්ව අලෙවි කළ බවට චෝදනා එල්ල වේ. මෙම නඩුවට පුද්ගලයින් 3,000ක් පමණ සම්බන්ධ වන අතර, එය සමාගම අභ්යන්තරයෙන්ම කළ ලිපි හුවමාරු සහ විද්යාත්මක වාර්තා මත පදනම් වී ඇත.
නඩුව මගින් චෝදනා කරන්නේ 1960 ගණන්වල මුල සිටම J&J සමාගම සිය ඛනිජ මත පදනම් වූ ටැල්කම් (talcum) පවුඩර්වල ටැල්කම් වල තන්තුමය ආකාර මෙන්ම ට්රෙමොලයිට් (tremolite) සහ ඇක්ටිනොලයිට් (actinolite) අඩංගු බව දැන සිටි බවයි. මෙම ඛනිජ වර්ග දෙකම තන්තුමය ස්වරූපයෙන් පවතින විට ඇස්බැස්ටෝස් ලෙස වර්ගීකරණය කර ඇති අතර එය මාරාන්තික පිළිකා සමඟ සෘජුවම සම්බන්ධ වේ.
ඛනිජ වර්ග පිළිකා සමඟ සෘජුවම සම්බන්ධ බව දැන සිටියද, J&J සමාගම කිසි විටෙකත් තම බේබි පවුඩර් ඇසුරුම්වල අනතුරු ඇඟවීම් නිකුත් නොකළ බව නඩු පත්රිකාවල සඳහන් වේ. ඒ වෙනුවට, එම පවුඩර් “පිරිසිදුකමේ සහ ආරක්ෂාවේ සංකේතයක්” ලෙස නිරූපණය කරමින් ආක්රමණශීලී අලෙවිකරණ ව්යාපාර දියත් කළ බවට නඩුව චෝදනා කරයි.
J&J සමාගම මෙම චෝදනා සහ ඇස්බැස්ටෝස් වලින් දූෂිත බේබි පවුඩර් දැනුවත්ව අලෙවි කළ බවට වන ඕනෑම ප්රකාශයක් ප්රතික්ෂේප කරයි. සමාගම වෙනුවෙන් නිකුත් කරන ලද ප්රකාශයක සඳහන් වී ඇත්තේ, බේබි පවුඩර් අවශ්ය නියාමන ප්රමිතීන්ට අනුකූල වූ බවත්, ඇස්බැස්ටෝස් අඩංගු නොවූ අතර, පිළිකා ඇති නොකරන බවත්ය.
කෙසේ වෙතත්, ටැල්කම් අඩංගු බේබි පවුඩර් අලෙවිය 2023 වසරේදී එක්සත් රාජධානියේ නතර කරන ලදී.
උපුටා ගැනීම: සියළු තොරතුරු BBC ඇසුරෙනි.
