මුහුණේ රූපලාවණ්ය ෆිලර් එන්නත් ලබා ගන්නා පුද්ගලයන්, රුධිර ප්රවාහයට හානි වීමෙන් සමේ හානි හා අන්ධභාවයට පවා හේතු විය හැකි, අවහිර වූ ධමනි සම්බන්ධ භයානක සංකූලතාවයක් ඇතිවීමේ අවදානම ගැන දැනුවත් විය යුතු බව විශේෂඥයන් පවසයි.
පර්යේෂකයන් විසින් අසාර්ථක වූ ෆිලර් එන්නත් සිද්ධීන් 100 ක් අධ්යයනය කිරීම සඳහා අල්ට්රා සවුන්ඩ් (Ultrasound) තාක්ෂණය භාවිතා කරන ලදී. මෙහිදී ඇතිවන අවහිරතා (vascular occlusion) සිදුවීම් එනම් ෆිලර් රුධිර වාහිනී තුළට හෝ ඒවාට ඉතා ආසන්නයට එන්නත් කිරීම සාමාන්යයෙන් දුර්ලභ වුවද, නිසි ලෙස ප්රතිකාර නොකළහොත් පටක මරණයට හා මුහුණේ විකෘතිතාවයට හේතු විය හැකි බව ප්රධාන පර්යේෂක ආචාර්ය Rosa Sigrist පවසයි.
සිද්ධීන්ගෙන් අඩකටත් වඩා අඩු ප්රමාණයකදී, අල්ට්රා සවුන්ඩ් ස්කෑන් මගින් මුහුණේ මතුපිටින් පිහිටි ධමනි ගැඹුරු ඒවාට සම්බන්ධ කරන කුඩා රුධිර වාහිනී වලට රුධිර ප්රවාහය නොමැති බව පෙන්නුම් කරන ලදී (42%). තුනෙන් එකකදී (35%), ප්රධාන රුධිර වාහිනීවල රුධිර ප්රවාහය නොමැති බව සොයා ගන්නා ලදී.
නාසය අවට ප්රදේශය විශේෂයෙන් අවදානම් සහිත එන්නත් ස්ථාන බව ආචාර්ය සිග්රිස්ට් පවසන්නේ, නාසික රුධිර වාහිනී හිසෙහි ඇති වැදගත් කොටස් කිහිපයක් සමඟ සන්නිවේදනය කරන බැවිනි. මෙම වාහිනී වලට සිදුවන හානිය නිසා සමේ හානි, අන්ධභාවය සහ ආඝාතය (stroke) වැනි දරුණු සංකූලතා ඇති විය හැකි බව ඇය පැහැදිලි කරයි.
අසල ඇති ධමනිවලට හානි වීම වැළැක්වීම සඳහා, මුහුණට ඩර්මල් ෆිලර් එන්නත් කිරීමට පෙර අල්ට්රා සවුන්ඩ් පරීක්ෂණ සිදු කරන ලෙස මේ වන විට රූපලාවණ්ය සායනවලට උපදෙස් දෙනු ලැබේ. අල්ට්රා සවුන්ඩ් භාවිතය, සනාල අවහිරතාවක් ඇති වූ විට ප්රතිකාරය නිශ්චිත ස්ථානයට යොමු කිරීමට උපකාරී වන අතර, එමඟින් hyaluronidase (ෆිලර් දියකරන එන්සයිමය) එන්නත් කිරීමේ නිරවද්යතාව වැඩි දියුණු කළ හැකි බව පර්යේෂණයෙන් පෙන්වා දී ඇත.
උපුටා ගැනීම: සියළු තොරතුරු BBC ඇසුරෙනි.
