හිටපු මැන්චෙස්ටර් යුනයිටඩ් සහ එංගලන්ත පාපන්දු තරුව ඩේවිඩ් බෙකම්, වින්ඩ්සර් මාලිගයේදී III වන චාල්ස් රජු අතින් නයිට් පදවිය (Knighthood) ලැබීම තම ජීවිතයේ “වඩාත්ම ආඩම්බරම මොහොත” ලෙසින් විස්තර කර තිබේ. ඔහුට මෙම ගෞරවය පිරිනමනු ලැබුවේ ක්රීඩාවට සහ පුණ්ය කටයුතු සඳහා ඔහු දැක්වූ සේවය වෙනුවෙනි.
සර් ඩේවිඩ් සිය රට වෙනුවෙන් 115 වතාවක් ක්රීඩා කළ අතර, මැන්චෙස්ටර් යුනයිටඩ්, රියල් මැඩ්රිඩ්, එල්ඒ ගැලැක්සි, පැරිස් සෙන්ට්-ජර්මේන් සහ ඒසී මිලාන් වැනි කණ්ඩායම් සඳහා ද ක්රීඩා කර, 2013 දී විශ්රාම ගියේය. ඔහු 2005 වසරේ සිට යුනිසෙෆ් (Unicef) තානාපතිවරයෙකු ලෙස කටයුතු කර ඇත. ඔහු ලන්ඩන් 2012 ඔලිම්පික් උළෙල සුරක්ෂිත කිරීමට ද ප්රධාන කාර්යභාරයක් ඉටු කළේය.
2024 දී, තරුණ තරුණියන්ට ස්වභාවධර්මය පිළිබඳ වැඩි අවබෝධයක් ලබා දීම සඳහා III වන චාල්ස් රජුගේ අධ්යාපන වැඩසටහන්වලට සහය දක්වමින් ඔහු The King’s Foundation හි තානාපතිවරයෙකු බවට පත් විය.
සර් ඩේවිඩ්ට මෙම ගෞරවය පිරිනමන අවස්ථාවේදී ඔහුගේ බිරිඳ වන වික්ටෝරියා, ලේඩි බෙකම් සහ ඔහුගේ දෙමාපියන් වන ටෙඩ් සහ සැන්ඩ්රා ඔහු සමඟ එක්ව සිටියහ. ඔහු මෙම අවස්ථාව සඳහා ඇඳ සිටියේ තම විලාසිතා නිර්මාණ ශිල්පී බිරිඳ විසින් නිර්මාණය කරන ලද අළු පැහැති ත්රි-පීස් සූට් (three-piece suit) එකකි. මෙම ඇඳුම නිර්මාණය කිරීමට තමා ආභාසය ලැබුවේ තරුණ වියේදී III වන චාල්ස් රජු ඇඳ සිටි ඇඳුමක් ආශ්රයෙන් බව ඔහු පැවසීය.
ලේඩි බෙකම් 2017 දී විලාසිතා කර්මාන්තයට කළ සේවය වෙනුවෙන් OBE (Order of the British Empire) සම්මානයක් ලබා ඇති අතර, සර් ඩේවිඩ් 2003 දී OBE නිලධාරියෙකු ලෙස පත් කර තිබුණි.
උපුටා ගැනීම: සියළු තොරතුරු BBC ඇසුරෙනි.
