ලොව පුරා අතිශය ජනප්රිය වූ හැරී පොටර් (Harry Potter) කතා මාලාව ඇසුරෙන් නිර්මාණය වන නවතම HBO රූපවාහිනී කතාමාලාවේ ප්රථම පූර්ව ප්රචාරක පටය (Trailer) මේ වන විට නිකුත් කර තිබේ. මිනිත්තු දෙකක කාලයකින් යුත් මෙම වීඩියෝව හරහා නවතම නළු නිළි පිරිස සහ කතාමාලාවේ ස්වරූපය පිළිබඳව ප්රථම වරට ඉඟි සපයා ඇත.
මෙම පූර්ව ප්රචාරක පටය ආරම්භ වන්නේ ඩර්ස්ලි (Dursleys) පවුලේ නිවසේ හැරී වෙසෙන පඩිපෙළ යට ඇති කුඩා කාමරයේ දර්ශනයකිනි. එහිදී වර්නන් මාමා සහ පෙටුනියා නැන්දා ප්රථම වරට දැකගත හැකි අතර, හැරී වෙත හෝග්වර්ට්ස් (Hogwarts) ලිපිය ලැබෙන අවස්ථාවේ පෙටුනියා නැන්දා ඔහුට පවසන්නේ ඔහු තුළ කිසිදු විශේෂත්වයක් නොමැති බවයි.
හැරීගේ සුප්රසිද්ධ වටකුරු කණ්ණාඩි, නළලේ ඇති අකුණු කැළල සහ දුම්රිය කවුළුවෙන් පෙනෙන වීස්ලි පවුලේ සාමාජිකයන්ගේ රතු පැහැති හිසකෙස් මෙහි මැනවින් නිරූපණය කර ඇත. හෝග්වර්ට්ස් වෙත ළඟා වූ පසු ප්රොෆෙසර් ස්නේප්, ඩම්බල්ඩෝර්, මිනර්වා මැක්ගොනගල් සහ හැරීගේ සමීපතම මිතුරන් වන රොන් සහ හර්මයිනි යන චරිතවල ප්රථම දර්ශන ඇතුළත් කර තිබේ.
මෙහිදී තේරීමේ තොප්පිය (Sorting Hat) සහ වැන්ඩ් නිෂ්පාදක ගැරික් ඔලිවැන්ඩර් ද දැකගත හැකි අතර, “මිස්ටර් පොටර්, ඔබෙන් විශාල දේවල් බලාපොරොත්තු විය හැකි බව මම සිතනවා” යැයි ඔහු හැරීට පවසනු ඇසෙයි. පාසල් නිල ඇඳුම්, පොදු කාමර සහ හිමෙන් වැසුණු පිටියකට පිවිසෙන ක්විඩිච් (Quidditch) ක්රීඩකයන්ගේ දර්ශන ද මෙයට ඇතුළත් වේ.
මෙම නව නිර්මාණය හැරී පොටර් මුල් කෘති සහ චිත්රපට මාලාව පදනම් කරගනිමින් නිර්මාණය වන අතර, එය HBO ආයතනය මගින් ඉදිරිපත් කරනු ලබයි.
උපුටා ගැනීම: සියළු තොරතුරු BBC ඇසුරෙනි.
