යුරෝපා සංගමයේ නායකයන් විසින් පැය 17ක දීර්ඝ සාකච්ඡාවකින් අනතුරුව යුක්රේනය වෙනුවෙන් යුරෝ බිලියන 90ක (ඩොලර් බිලියන 105ක් පමණ) ණය මුදලක් ලබා දීමට එකඟතාවකට පැමිණ තිබේ. මෙම ණය මුදල ඉදිරි වසර දෙකක කාලය තුළ යුක්රේනයේ ආර්ථිකය ශක්තිමත් කිරීම සඳහා යොදා ගැනීමට නියමිතය.
ලබන වසරේ වසන්ත කාලය වන විට යුක්රේනය සතු මුදල් අවසන් වීමේ අවදානමක් පැවති බැවින්, මෙම ණය මුදල ඔවුන්ගේ ආර්ථික ඔරොත්තු දීමේ හැකියාවට ඉතා තීරණාත්මක වනු ඇත. යුරෝපා සංගමය සතුව අත්හිටුවා ඇති රුසියානු වත්කම් (යුරෝ බිලියන 210ක් පමණ) මෙම ණය සඳහා භාවිතා කිරීමට මුලින් සැලසුම් කළද, එය අසාර්ථක විය. රුසියාවෙන් එල්ල විය හැකි නීතිමය සහ දේශපාලනික පලිගැනීම් පිළිබඳව බෙල්ජියම බිය පළ කිරීම මීට ප්රධාන හේතුවයි.
මෙම ණය මුදල ආපසු ගෙවනු ලබන්නේ යුද්ධයෙන් සිදු වූ හානි වෙනුවෙන් රුසියාව විසින් යුක්රේනයට වන්දි ගෙවීම ආරම්භ කළ පසුව බව යුරෝපා සංගමය අවධාරණය කරයි.
රුසියානු ජනාධිපති ව්ලැඩිමීර් පුටින් මෙම පියවර දැඩි ලෙස විවේචනය කර ඇති අතර, මෙය මංකොල්ලකෑමට දැරූ උත්සාහයක් ලෙස ඔහු හඳුන්වා දී ඇත. රුසියානු නිලධාරීන් පවසන්නේ යුරෝපා සංගමය මෙවැනි තීරණ ගැනීම මගින් මූල්ය ස්ථාවරත්වයට මරු පහරක් එල්ල කර ඇති බවයි.
උපුටා ගැනීම: සියළු තොරතුරු BBC ඇසුරෙනි.
